- 35 రోజుల్లో ఐదు రాష్ట్రాల్లో ఐదుగురు ఒంటరి మహిళల హత్య
- సికింద్రాబాద్ రైల్వే స్టేషన్లోనూ మహిళ మర్డర్
- గుజరాత్ పోలీసులకు చిక్కిన సీరియల్ కిల్లర్
సికింద్రాబాద్, వెలుగు: రైళ్లల్లో ఒంటరిగా ప్రయాణిస్తున్న మహిళలే లక్ష్యంగా అత్యాచారం చేసి చంపేస్తున్న సైకో సీరియల్ కిల్లర్ రాహుల్ను గుజరాత్ పోలీసులు అరెస్ట్ చేశారు. ఈ నెల 24వ తేదీన సికింద్రాబాద్ రైల్వే స్టేషన్లో ఓ మహిళను హత్య చేసి గుజరాత్ పారిపోయాడు. అక్కడి పోలీసులు అతన్ని అరెస్ట్ చేసి సికింద్రాబాద్ రైల్వే పోలీసులకు సమాచారం ఇచ్చారు. దీంతో సైకో కిల్లర్ను పీటీ వారెంట్పై హైదరాబాద్కు తీసుకొస్తున్నారు.
ఈ నెల 24న మణుగూరు ఎక్స్ప్రెస్లో సికింద్రాబాద్కు వస్తున్న వెంకట రమణమ్మ (45) అనే మహిళను హత్య చేశాడు. ఆమె వద్ద ఉన్న నగదు, సెల్ఫోన్ తీసుకుని పారిపోయాడు. అక్టోబర్ 17 నుంచి నవంబర్ 24 మధ్య ఐదు రాష్ట్రాల్లో.. ఐదు హత్యలు చేశాడు. గుజరాత్ లోని వల్సాద్ రైల్వే స్టేషన్లో అనుమానాస్పదంగా తిరుగుతున్న రాహుల్ను అక్కడి పోలీసులు అదుపులోకి తీసుకుని విచారించారు. సికింద్రాబాద్ రైల్వే స్టేషన్లో మహిళను హత్య చేసినట్టు అంగీకరించాడు. దీంతో వల్సాద్ పోలీసులు సికింద్రాబాద్ జీఆర్పీ పోలీసులకు సమాచారం ఇచ్చారు.
రైల్లో బీడీ కాల్చొద్దన్నందుకు మొదటి హత్య
హర్యానాలోని రోహతక్కు చెందిన భోలోకరమ్ వీర్ జాట్ అలియాస్ రాహుల్ దివ్యాంగుడు. ఒంటరిగా గడిపేవాడు.సైకో మాదిరి ప్రవర్తిస్తుండటంతో కుటుంబ సభ్యులు కూడా అతన్ని దూరం పెట్టారు. హైవే మీదున్న దాబాల్లో పని చేస్తూ లారీలను దొంగలించడం మొదలుపెట్టాడు.రాజస్థాన్, యూపీ, ఉత్తరాఖండ్ రాష్ట్రాల్లో రాహుల్పై 13 కేసులున్నాయి. ఈ ఏడాది మే వరకు రాజస్థాన్లోని జైల్లో ఉన్నాడు. బెయిల్పై బయటికొచ్చి గుజరాత్ వెళ్లిపోయాడు. దివ్యాంగుల రైల్వే పాస్తో రైళ్లల్లో దేశమంతా తిరిగేవాడు. అక్టోబర్ 17న బెంగళూరు–మురుదేశ్వర్ రైల్లో ఫస్ట్ టైమ్ ఓ ప్రయాణికుడిని హత్య చేశాడు. రైల్లో బీడీ కాల్చొద్దన్నందుకు గొంతు నులిమి చంపేశాడు.
2,500 కెమెరాలు పరిశీలించిన పోలీసులు
కతిహార్ ఎక్స్ప్రెస్లో ఓ వృద్ధుడిని,కన్యాకుమారి ఎక్స్ప్రెస్లో మహిళను చంపేశాడు. ఉద్వాడా రైల్వే స్టేషన్లో మరో మహిళను పక్కనే ఉన్న మామిడి తోటలోకి లాక్కెళ్లి రేప్ చేసి హత్య చేశాడు. వల్సాద్ పోలీసులు కేసు మహిళ బ్యాగు ఆధారంగా దర్యాప్తు ప్రారంభించారు. ఆయా రైల్వే స్టేషన్లలోని 2,500 సీసీ కెమెరాలను పరిశీలించి రాహుల్ను గుర్తించారు.
పీటీ వారెంట్పై త్వరలో హైదరాబాద్కు..
కర్నూలుకు చెందిన భరత గోవిందప్ప, వెంకట రమణమ్మ దంపతులు కర్నాటకలోని బళ్లారి జిల్లా సోంపోటు తాలూకా తోర్నగల్లో స్థిరపడ్డారు. వీరికి ఇద్దరు కూతుళ్లు, ఒక కొడుకు. హైదరాబాద్లోని జగద్గిరిగుట్టలో నివాసం ఉంటున్న పెద్ద కూతురును చూసేందుకు ఈ నెల 23న రాత్రి 7 గంటలకు తోర్నగల్ రైల్వే స్టేషన్లో మణుగూరు ప్యాసింజర్ రైలు ఎక్కింది. అదే బోగీలో సైకో కిల్లర్ రాహుల్ ఎక్కాడు. రైలు సికింద్రాబాద్కు వస్తున్న క్రమంలో రమణమ్మ మెడకు టావెల్ బిగించి హత్య చేశాడు. ఆమె వద్ద ఉన్న రూ.25వేల నగదు, సెల్ఫోన్ తీసుకుని దిగిపోయాడు.
బాంద్రా–భుజ్ ఎక్స్ప్రెస్ ఎక్కి సోమవారం గుజరాత్ చేరుకున్నాడు. రమణమ్మ డెడ్బాడీని దివ్యాంగుల బోగీలో ఆమె బంధువులు గుర్తించి రైల్వే పోలీసులకు సమాచారం ఇచ్చారు. కేసు నమోదు చేసుకుని దర్యాప్తు చేపట్టారు. ఇదే క్రమంలో గుజరాత్లోని వల్సాద్ రైల్వే స్టేషన్లో దిగిన రాహుల్ను అక్కడి రైల్వే పోలీసులు పట్టుకుని విచారించగా.. నేర చరిత్ర అంతా బయటపడింది. వారం రోజుల్లో అతన్ని హైదరాబాద్కు తీసుకొస్తామని రైల్వే ఇన్స్పెక్టర్ సాయి ఈశ్వర్ గౌడ్ తెలిపారు.
